पाकिस्तानको बलुचिस्तानका स्थानीयद्वारा सैन्य अतिक्रमण विरुद्ध प्रदर्शन

बलुचिस्तान— पाकिस्तानको बलुचिस्तानको मन्ड शहरका स्थानीयहरुले पाकिस्तानी सेनाले आफ्नो भूमि जबरजस्ती कब्जा गरेको विरोधमा प्रदर्शन गरेका छन्।

द बलुचिस्तान पोष्ट अनुसार प्रदर्शनमा महिला, बालबालिका र वृद्धहरू सहभागी भएका थिए । उनीहरुले पाकिस्तानी सेनाको नियन्त्रणमा रहेको आफ्नो पुर्खाको भूमि तुरुन्त खाली गर्न माग गरिरहेका छन्।

स्थानीयले फ्रन्टियर कोरले मान्डको मेहेर क्षेत्रमा रहेको आफ्ना घरमा स्थायी सैन्य आधार शिविरहरूमा स्थापित गरेको बताएका छन्। पाँच वर्षअघि सुरक्षाकर्मीले जनताको सम्पत्ति नियन्त्रणमा लिएका थिए ।

बलुचिस्तान पोस्टका अनुसार एफसीले यस क्षेत्रमा शिविरहरूको संख्या बढाउन आफ्नो सैन्य कब्जा विस्तार गर्न अन्तिम चेतावनी जारी गरेको छ। जसका कारण कब्जामा लिइएको सम्पति फिर्ता नगरेसम्म स्थानीयले आन्दोलन गरेका छन् । त्यहाँका स्थानीयले सेनाको चलिरहेको अतिक्रमण आफ्नो मानवअधिकार र संस्कृति विरुद्ध भएको दाबी गरेका छन्।

मेहेर क्षेत्रका महिला आन्दोलनकारीले आफ्नो जग्गा फिर्ता नहुँदासम्म प्रदर्शन रोक्न अस्वीकार गरेका छन् ।

उनीहरुले स्थानीय प्रशासनलाई आफ्नो जग्गा खाली गर्न आग्रह गरे पनि सुरक्षाकर्मीले अतिक्रमण जारी राखेका छन् ।

सेनाद्वारा भूमिको निरन्तर कब्जा, ड्रोन निगरानी र सशस्त्र गस्तीले बलूचका बासिन्दाहरूको मनमा डर र आतंक सिर्जना गरेको छ।