दुई पटक म्याद थप्दा पनि नारायणगढ-बुटवल सडकमा ४६ प्रतिशत मात्रै काम



पूर्वपश्चिम राजमार्गअन्तर्गत नारायणगढ-बुटवल सडकखण्ड विस्तारको काम शुरू भएको पाँच वर्ष पूरा हुँदा ४६ प्रतिशत मात्रै भौतिक प्रगति भएको छ।

सडक विस्तारको काम २०७९ साउन २२ मा सम्पन्न गर्नेगरी चीनको चाइना स्टेट कन्स्ट्रक्सन इन्जिनियरिङ कर्पोरेशन लिमिटेडले २०७५ माघ २४ मा सम्झौता गरेको थियो। विस्तारको काम शुरु भएको ४२ महीनाभित्र काम सक्नेगरी जिम्मा पाएको कम्पनीले समयमा काम सम्पन्न गर्न नसक्दा दुई पटक म्याद थपी सडक विस्तारको काम भइरहेको छ।

नारायणगढ-बुटवल सडक विस्तार योजना पूर्वी खण्डका सूचना अधिकारी इञ्जिनियर शिव खनालले पहिलोपटक थप गरिएको समय २०८० भदौ १२ मा सकिएपछि दोस्रोपटक समय थप गरेर आयोजना पूरा गर्ने समय २०८१ साउन ८ सम्म थपिएको छ। “राष्ट्रिय गौरवको आयोजनाका रुपमा रहेको सडक विस्तारको पाँच वर्ष पुग्दा हालसम्म जम्मा ४६ प्रतिशत काम सकिएको छ”, खनालले भने, “दोस्रोपटक म्याद थप गरेपछि निर्माण व्यवसायीले हालसम्म ५८ प्रतिशत काम गर्छौं भनेर योजना बनाएको भए पनि त्यो पूरा गर्न सकेको छैन।”

निर्माण व्यवसायीलाई दोस्रोपटक म्याद थपिएको समय सकिन करीब पाँच महीना बाँकी हुँदा हालसम्म सडकको एकतर्फी कालोपत्रेको काम २०.३८ किलोमिटर मात्रै भएको बताए। दुईतर्फी कालोपत्रेको काम १३० किलोमिटर गर्नुपर्नेछ। “निर्माण व्यवसायीले बनाएको कार्य योजनाअनुसार, कुनै पनि काम गरेको छैन,” खनालले भने, “निर्माण व्यवसायीले बनाएको योजना र हामीले गर्नका लागि भनेको योजना पनि फरक छ। निर्माण व्यवसायी आफैँले बनाएको योजनाअनुसार काम गर्न सकेको छैन।”

सडक विस्तारका लागि चालकसहितका सबै कामदार गरी ६२६ जना निर्माणमा संलग्न रहेको उनले बताए। “निर्माण व्यवसायीले एक हजार ५४१ कामदार आवश्यक पर्छ भनेर भनेको थियो। तर हामीले दुई हजार २०० मजदुर आवश्यक पर्ने प्रक्षेपण गरेका थियौं,” उनले भने, “आफैंले बनाएको कार्ययोजनासमेत निर्माण व्यवसायीले पूरा गर्न सकेको देखिएन।”

सडक विस्तारका लागि योजनाले पेभर (कालोपत्रे गर्ने उपकरण) दुईवटा आवश्यक पर्ने भनेकामा निर्माण व्यवसायीले एउटा उपकरणबाट मात्रै कालोपत्रे गरेको, ग्रेडर (सडक सम्याउने उपकरण) योजनाले २५  आवश्यक पर्ने भनेकामा निर्माण व्यवसायीले निर्माण व्यवसायीले १६ वटाबाट काम गर्ने जनाएकामा जम्मा सातवटा मात्रै ग्रेडरको प्रयोग भएको उनले बताए। त्यस्तै, स्काभेटर (माटो खन्ने उपकरण) ४० आवश्यक पर्नेमा निर्माण व्यवसायीले २६ वटाबाट काम गर्छौं भन्दै नौवटा मात्रै प्रयोग गरेको, रोलर (कालोपत्रे गर्नुअघि सडक सम्याउने उपकरण) ४५ वटा आवश्यक पर्ने भनिएकामा २६ वटाबाट काम गर्छौैं भन्दै नौवटा रोलर मात्रै सडकमा प्रयोग गरेको खनालले बताए।

निर्माण व्यवसायीले आफैँले बनाएको योजनाअनुसार काम नगर्दा सडक विस्तारको कामले गति लिन नसकेको उनको भनाइ छ। “कार्यतालिकाअनुसार काम गर्न र आयोजनाको काम समयमै सम्पन्न गर्न हामीले निरन्तर दबाब दिइरहेका छौं,” खनालले भने, “निर्माण व्यवसायीले लो बिडिङ (कम मूल्य)मा ठेक्का सकारेका कारण नगद प्रवाह गर्न नसक्दा भनेअनुसार काम गर्न सकेको छैन।”

चाइना स्टेट कन्स्ट्रक्सन इन्जिनियरिङ कर्पोरेसन लिमिटेडका ठेक्का सहव्यवस्थापक राकेश झाले दोस्रोपटक थप भएको समयमा सडक विस्तारको काम नसकिने बताउँदै अझै एक वर्ष म्याद थप्नुपर्ने जिकिर गरे। “सडक विस्तारको शुरुआती समयमा विभिन्न कारणले काममा ढिलाइ भएको थियो, अहिले पनि मौसमका कारण सडकको काम तीव्ररुपमा गर्न सकिएको छैन,” झाले भने, “कावासोती, प्रगतिनगरलगायत ठाउँमा कालोपत्रे गर्न तयारी गरिएको भए पनि रातिमा शीत खस्ने र मौसम चिसो भएका कारण कालोपत्रे गर्न सकिएको छैन।”

२०८१ साउन ७ सम्म आयोजनाको करीब ७० प्रतिशत काम पूरा गर्नेगरी खटिएको उनको भनाइ छ। “साउनसम्म हामीले गैँडाकोटबाट दाउन्नेसम्म एकतर्फी कालोपत्र गर्नेगरी काम गरिरहेका छौं,” उनले भने, “त्यसपछिको बाँकी काम २०८१ चैतभित्र सकाउने हाम्रो योजना छ।”

सडक विस्तार गर्ने केही ठाउँमा खानेपानी र बिजुलीको पोल सार्ने काम बाँकी रहेको भन्दै उहाँले साइड क्लियर भएको ठाउँमा काम धमाधम अघि बढेको जानकारी दिए। “यो फेब्रुअरीसम्म सिजी, गैँडाकोट र दुम्कीबास क्षेत्रमा ३० केभी प्रसारण लाइन सार्ने काम सकिन्छ,” उनले भने, “विद्युत्को पाँच किलोमिटर पोल सार्ने र खानेपानीको ६ किलोमिटर पाइप सार्ने कामपछि सडकका सबै बाधा सकिन्छन्।”

आयोजनाअन्तर्गत अहिले बाँकी रहेका कल्भर्ट निर्माण गर्ने, पहाडको भित्तो काट्ने, पर्खाल लगाउने, सडक किनारमा ग्याभिन भर्ने, बस वे (सवारीसाधन रोक्ने ठाउँ) बनाउने, कालोपत्रे गर्ने सडक खन्ने र नयाँ बनाउने, माटो भर्ने, बेस र सब बेसको काम भइरहेको उनको भनाइ छ। नारायणगढबाट-बुटवलसम्मको जम्मा ११४ किलोमिटर सडकमध्ये पूर्वीखण्डमा ६५ किलोमिटर सडक रहेको छ।

२०१८ सालमा गैँडाकोटको शिलान्यास चोकबाट पूर्वराजा महेन्द्रले शिलान्यास गरेको सडक करीब ५८ वर्षपछि एशियन राजमार्गको गुणस्तर मापदण्डमा विस्तार भइरहेको छ। चार लेनमा विस्तार हुने नारायणगढ-बुटवल सडकका दुई-दुई लेनको बीचमा ‘ग्रिनरी’ सहितको सडक निर्माण हुनेछ। तीन मिटरको बीच भागमा बिरुवा लगाइनेछ।

हाल रहेको दुई लेनको सडक विस्तारपछि दुईतर्फ सात-सात मिटरको हुनेछ। बजार क्षेत्रमा ६-६ मिटरको ‘सर्भिस लेन’ समेत निर्माण गरिनेछ। बजार क्षेत्रको १७.६ किलोमिटर सडकमा अतिरिक्त सर्भिस लेन निर्माण हुनेछ।

सडकको ४२.७ किलोमिटर खण्ड चार लेनको हुनेछ भने दाउन्ने खण्डको करीब पाँच किलोमिटर सडक तीन लेनको हुने सूचना अधिकारी खनालले बताए। यस खण्डमा १२ वटा ठूलो पुल (मेजर ब्रिज) र सानो २२ वटा (माइनर ब्रिज) बन्ने क्रममा छन्। सडकका विभिन्न स्थानमा निर्माण हुने २१५ वटा कल्भर्टमध्ये अधिकांशको काम सकिएको छ।

एशियाली विकास ब्यांकको ८५ प्रतिशत ऋण सहयोगमा निर्माण शुरु भएको यस खण्डको कूल लागत नौ अर्ब ३८ करोड रहेकामा हालसम्म तीन अर्ब ७६ करोड ६६ लाख आर्थिक प्रगति भएको खनालले बताए। (रासस)

प्रकाशित मिति : २४ माघ २०८०, बुधबार  ११ : ५४ बजे