काठमाडौं :
राष्ट्रपतिको उम्मेदवारी दिने मिति नजिकिएसँगै नेकपा एकीकृत समाजवादीका अध्यक्ष माधवकुमार नेपालको चर्चा चुलिएको छ।
उनको दलका एक जना नेताले राष्ट्रपतिको प्रस्ताव आएमा पार्टीले स्वीकार गर्ने बताएका छन्।
उपमहासचिव गङ्गालाल तुलाधरले भने, “कसैको प्रस्तावमा उम्मेदवार हुन पाउने वा नपाउने कुराले त्यति धेरै उत्साहित हुने कुरा छैन। तर प्रस्ताव आयो भने स्वीकार गर्नुपर्छ भन्ने नै छ।”
प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रपतिमा नेता नेपालको नाम विकल्पको रूपमा चर्चा गरेको खबरबारे टिप्पणी गर्दै उनले त्यस्तो बताएका हुन्।
प्रधानमन्त्री प्रचण्डले नेपाली कांग्रेसका सभापति शेरबहादुर देउवा सहितका कांग्रेस नेतासँगको औपचारिक छलफलमा नेकपा एमालेबाट नेता नेपालको नाम प्रस्ताव हुनसक्ने सम्भावना औँल्याएको खबर बाहिर आएको छ।
नेता तुलाधरका बुझाइमा उनको दलसँग राष्ट्रपति चुनावमा आवश्यक पर्ने मत भार राम्रै छ।
उनले भने, “दोस्रो कुरा गठबन्धन तोडिने, नयाँ गठबन्धन बन्ने, पुरानो सरकार जाने, नयाँ सरकार बन्ने स्थिति पनि होला। त्यसो हुँदा हामीसँग रहेका १० जना सांसदको भूमिका महत्त्वपूर्ण नै हुन्छ।”
त्यसैले आफ्नो दललाई अरूले प्रस्ताव गर्दा स्वीकार गर्नुपर्ने कुरा भएको उनको भनाइ छ, “त्यसकारण अरूलाई बनाउने मात्र होइन, आफू बन्ने सम्भावना भयो भने होइन होइन हामी बन्दैनौँ किन भन्नु पर्या छ र?”
माधव नेपालको पार्टीले साथ दिएमा सरकार बनाउँदा सुरुमा समर्थन गर्ने दलहरू एक ढिक्का रहे तर माओवादी मात्रै बाहिरियो भने पनि नयाँ सरकार बनाउने बहुमत उनीहरूसँग रहने देखिन्छ।
एमाले अध्यक्ष केपी ओली र नेता नेपालबीचको कटुतापूर्ण सम्बन्धका कारण एमालेले प्रस्ताव गर्ने अनि कांग्रेस र माओवादी छाडेर माधव नेपाल एमालेसँग नजिक हुने सम्भावना कमजोर रहेको ठान्नेहरू पनि छन्।
‘एमालेले नेपालको नाम अघि सार्ने तर कांग्रेसमाथि विश्वासघात भएको मनोविज्ञान बन्ने अवस्था आफ्नो निम्ति प्रिय नहुने कुरा आफूहरूबीच हुने गरेको’ नेता तुलाधरले बताए।
उनका अनुसार यदि ओली अनुकूलको व्यक्तिलाई राष्ट्रपति बनाउन दिनुभन्दा माधव नेपाललाई सबैले स्वीकार गर्ने अवस्था बन्दा त्यसबारे छलफल र बहस गर्न सकिने अनौपचारिक कुराकानी कांग्रेससँग विगतमा भएको थियो।
माओवादी केन्द्रले समर्थन गरेमा कांग्रेसलाई पनि मनाउन सकिने दाबी गर्दै उनी भन्छन्, “कांग्रेसले पनि हामीलाई भोट हाल्न सक्ने परिस्थिति सिर्जना गर्नुपर्ने हुन्छ, त्यो अलिकति गाह्रो काम छ, तर हामी गर्छौँ।”
प्रतिक्रिया