कञ्चनपुर : पाँच वर्षको उमेरमै पक्षघात हुँदा अपांगता भएका कञ्चनपुरको लालझाडी गाउँपालिका–१ नौरंगाका ४२ वर्षीय दयाराम रानाले सीपमूलक कार्य गर्नका लागि अनुदान रकमको व्यवस्था गर्ने उम्मेदवारलाई भोट दिने सोच बनाउनुभएको छ ।

फर्निचर निर्माण गर्ने परम्परागत सीप सिकेका राना आधुनिक किसिमका फर्निचर निर्माण गर्नका लागि सीप सिकेर आफ्नै फर्निचर उद्योग सञ्चालन गर्न चाहनुहुन्छ । “परम्परागत सीपलाई आधुनिकिकरण गर्न नसक्दा थोरै आम्दानी हुन्छ”, उहाँले भन्नुभयो, “तीन छोरासहित पाँच जनाको परिवारको खर्च चलाउन परम्परागत सीपले धान्दैन ।” अपांगता भएका व्यक्तिलाई सीपमूलक कार्य गर्नका लागि अनुदान रकम र तालीमका लागि सहयोग गर्ने उम्मेदवारलाई यस पटक मतदान गर्न आतुर भए पनि अहिलेसम्म कोही पनि मत माग्नै नआएको उहाँले बताउनुभयो ।

अपांता भएका व्यक्तिलाई समाजमा हेर्ने दृष्टिकोणमा परिवर्तन नआउँदा उम्मेदवारले समेत भेटेनन् नौरंगामा आयोजना गरिएको २६औँ अन्तर्राष्ट्रिय अपांग दिवसका अवसरमा भेटिएका रानाले गुनासो गर्दै बताउनुभयो । राजनीतिक दलका कार्यकर्तालाई अपांगका आवाज उम्मेदवारसम्म पु¥याइदिन आग्रह गरिएको उहाँले बताउनुभयो । अपांगता भएका व्यक्तिलाई सपांग जस्तै शिक्षा, स्वास्थ्य र रोजगारका क्षेत्रमा अवसर दिई आत्मनिर्भर बनाइनुपर्ने जानमती रानाले बताउनुभयो ।

“परिवार र समाजका लागि केही गर्न चाहन्छौँ”, उहाँले भन्नुभयो, “हामीलाई अवसर दिनुप¥यो, त्यसका लागि सक्षम उम्मेदवारलाई यस पटक छनोट गरेर नै मतदान गर्छौं ।” अपांगता हँुदा विगतमा समाजमा घृणा गर्ने, होच्याउने, अपांगता भएका परिवारका लागि बोझ जस्ता शब्द सुनेर २७ वर्षीया सोमवती राना वाक्क र दिक्क मान्ने गरेको बताउनुहुन्छ ।

हाल गैरसरकारी संस्थामा सानै पदमा भए पनि जागिर पाएपछि समाजले हेर्ने दृष्टिकोणमा परिवर्तन आएको बताउनुहुन्छ । सबैले सम्मान गर्छन्, आदर साथ बोलाउँछन्, यो सबै आफँै कमाएर परिवारको खर्च धान्न थालेपछि भएको बताउनुहुन्छ । सबै अपांगता भएका व्यक्तिलाई अवसर दिइए कार्य गर्न सक्छन् यसका लागि राज्यको नीतिमा परिवर्तन गरी अपांग समावेशी कानून बनाई कार्यान्वयन गर्ने दक्ष उम्मदेवारलाई भोट दिनुपर्ने उहाँको भनाइ रहेको छ ।

अपांगता भएका व्यक्तिले शिक्षा, स्वास्थ्य, रोजगार पाउनका लागि निर्णायक तहमा अपांगता भएका व्यक्तिको प्रतिनिधित्वको मागसमेत अघि सारेका छन् । सामाजिक सुरक्षाअन्तर्गत पाउँदै आएको भत्ताको रकम र छात्रवृत्तिको रकममा समेत जीवन धान्न सकिने गरी उपलब्ध गराइनुपर्ने अपांगता भएका व्यक्तिको भनाइ रहेको छ । विसं २०६८ को जनगणनाअनुसार कञ्चनपुरमा चार लाख ५१ हजार २४८ जनसङ्ख्यामध्ये नौ हजार ७० जना अपांगता भएका व्यक्ति रहेका छन् । जुन कूल जनसङ्ख्याको दुई प्रतिशत रहेको छ । प्रदेश नं ७ का नौ वटै जिल्लामा भने अपांगता भएका व्यक्तिको जनसङ्ख्या ६७ हजार ८३० रहेको छ ।

तपाईको प्रतिक्रिया