तेह्रथुम : प्रदेश नं १ को पहाडी जिल्ला तेह्रथुममा चुनावी चहलपहल ह्वात्तै बढेको छ । दोस्रो चरणमा मंसिर २१ गते हुने प्रतिनिधिसभा र प्रदेशसभाका सदस्यको चुनावका लागि उम्मेदवारी दर्तापछि अहिले नेता चुनावी प्रचार प्रसारमा लागेका छन् । जिल्लाबाट प्रदेशसभा सदस्यमा क्षेत्र नं २ बाट आठ राजनीतिक दलका उम्मेदवार प्रतिस्पर्धामा उत्रिएका छन् । जिल्लाको पूर्वी क्षेत्रका मेन्छ्यायेम, फेदाप र आठराई गाउँपालिका रहेको यो निर्वाचन क्षेत्रमा पनि नेपाली काँग्रेस र वाम गठबन्धनकै बीचमा मुख्य प्रतिस्पर्धा हुने देखिन्छ ।

संयोग त के छ भने टिकट पाउने बेला ती दुवै प्रतिस्पर्धी उम्मेदवारको चर्चा प्रतिनिधिसभाका लागि चलेको थियो । तर टिकट भने प्रदेशसभाको मात्रै पाएका छन् । प्रतिनिधिसभा सदस्यका लागि जिल्लाबाट सिफारिश भए पनि पार्टीले प्रदेशको मात्रै टिकट दिएपछि यी दुईको चुनावी प्रतिस्पर्धा झनै रोचक बनेको छ । वाम गठबन्धनका लागि यस क्षेत्रबाट तेजमान कन्दङवाको उम्मेदवारी छ । उहाँ नेकपा एमालेको प्रदेश संगठन कमिटी सदस्य तथा पूर्वजिल्ला अध्यक्षसमेत भइसक्नुभएका बौद्धिक नेता मानिनुहुन्छ । यस क्षेत्रमा नेपाली काँग्रेसबाट विजय सम्बाहाम्फे उम्मेदवार बन्नुभएको छ । सम्बाहाम्फे प्याब्सनको केन्द्रीय अध्यक्षसमेत हुनुहुन्छ ।

एमाले उम्मेदवार कन्दङवालाई जिल्ला कमिटीले प्रतिनिधिसभा सदस्यका लागि उम्मेदवार बनाउन सिफारिश गरेको थियो । तर केन्द्रीय कमिटीले प्रतिनिधिसभामा निवर्तमान सांसद भवानीप्रसाद खापुङलाई नै तेस्रो पटक उम्मेदवार बनाउँदै कन्दङवालाई प्रदेश सभा सदस्यको मात्रै टिकट दिएको हो । काँग्रेस उम्मेदवार सम्बाहाम्फेलाई भने नेकपा माओवादी केन्द्रले जिल्लाबाट प्रतिनिधिसभा सदस्यका लागि सिफारिश गरेको थियो । माओवादी केन्द्रको केन्द्रीय सल्लाहकार रहेका सम्बाहाम्फे भने एमाले र माओवादीबीच वाम एकताको सहमतिपछि काँग्रेस प्रवेश गर्नुभएको थियो । तेह्रथुम काँग्रेसको कोषाध्यक्षसमेत भइसक्नुभएका उहाँ झण्डै १० वर्षपछि काँग्रेसमै फर्केर प्रदेशसभा सदस्यको उम्मेदवार बन्नुभएको हो ।

कन्दङवा आठराई गाउँपालिका–५, छातेढुंगाका स्थायी बासिन्दा हुनुहुन्छ भने सम्बाहाम्फे फेदाप गाउँपालिका–३, जलजलेका हुनुहुन्छ । पूर्वको शैक्षिक धरोहरका परिचित आठराई क्षेत्र र यहाँको शैक्षिक उन्नयनमा कन्दङवाको योगदान छ । सम्बाहाम्फेसँग प्याब्सनमा दुई दशकसम्म काम गर्दै अध्यक्षसमेत भएर निजी शैक्षिक संस्थाको कुशल व्यवस्थापक र राज्यका विभिन्न नीतिनियम निर्माणमा काम गर्दाको अनुभव छ । चुनाव जिते दुवैले यस क्षेत्रको शैक्षिक उन्नयन गर्ने एजेण्डा लिएका छन् । यहाँका युवालाई स्वरोजगार बनाउन प्राविधिक र व्यावसायिक शिक्षाको खाँचो रहेको प्याब्सन अध्यक्ष सम्बाहाम्फे बताउनुहुन्छ । कन्दङवा ‘यहाँको सिंगो विकासका लागि शैक्षिक क्षेत्रको व्यवस्थापन अपरिहार्य छ,’ भन्नुहुन्छ ।

यहाँका सडक निर्माण, कृषि आधुनिकीकरण, वैज्ञानिक भूमिसुधार, हवाई मैदान, पर्यटन प्रवद्र्धनजस्ता एजेण्डा कन्दङवाले उठाउनुभएको छ । सम्बाहाम्फे भने समग्र क्षेत्रको विकासको बाटो सहज भए पनि जिल्लाबाट अहिलेसम्म निर्वाचित प्रतिनिधिले काम नगरेको भन्दै आफूलाई एक पटक अवसर दिएर काम लगाउन अनुरोध गर्नुहुन्छ । स्थानीय चुनावमा यस क्षेत्रका तीनवटै गाउँपालिका नेकपा एमालेले जितेको थियो । त्यसैले आफ्नो जित सुरक्षित रहेको गठबन्धनका उम्मेदवार कन्दङवा दाबी गर्नुहुन्छ । माओवादीबाट दलबलसहित फर्किनुभएका सम्बाहाम्फे आफूलाई काँग्रेसको बलियो संगठनका साथ भएकाले आफू जित्नेमा विश्वस्त हुनुहुन्छ । उम्मेदवारहरु चुनावी प्रचारमा निस्किन थालेपछि अहिले यस क्षेत्रमा यी दुवै उम्मेदवारको निकै चर्चा छ ।

प्रतिनिधिसभामा दुवै दलका उम्मेदवारसमेत यही क्षेत्रका भएकाले पनि यो क्षेत्रमा अहिले चुनावी चहलपहल छ । प्रतिनिधिसभामा काँग्रेसबाट आठराई गाउँपालिका–४, इवाकी भौतिक पूर्वाधार राज्यमन्त्री सीता गुरुङ र वाम गठबन्धनबाट मेन्छ्यायेम गाउँपालिका–६, मोराहाङका खापुङ मुख्य प्रतिस्पर्धी उम्मेदवार बन्नुभएको छ । प्रदेशसभाका लागि क्षेत्र नं २ मा मंगोल नेशनल अर्गनाइजेशनका डम्बर लिम्बू, राष्ट्रिय जनमुक्ति पार्टीका मानबहादुर लिम्बू, संघीय समाजवादी फोरमका मानध्वज सम्बाहाम्फे, राप्रपा प्रजातान्त्रिकका यशोदादेवी कार्की, नयाँ शक्ति पार्टी नेपालका राजेन्द्र कन्दङवा र संघीय लोकतान्त्रिक राष्ट्रिय मञ्चका विष्णुकुमार चोङवाङको उम्मेदवारी रहेको छ ।

तपाईको प्रतिक्रिया