चितवन : चितवनमा बिहीबारदेखि क्यान्सरसम्बन्धी अन्तर्राष्ट्रिय सम्मेलन हुने भएको छ । सार्क फेडेरेशन अफ अंकोलोजिष्ट नेपालको आयोजनामा विश्वका विभिन्न देशका विशेषज्ञ चिकित्सकको सहभागितामा अन्तर्राष्ट्रिय सम्मेलन हुन लागेको आयोजक समितिका संयोजक डा भोलाप्रसाद रौनियारले जानकारी दिनुभयो ।

चितवनको क्यान्सर असपतालमा कात्तिक १६ देखि १८ गतेसम्म आयोजना हुने उक्त सम्मेलनमा करिब ३०० विशेषज्ञ चिकित्सकको सहभागिता रहने जनाइएको छ ।

डा रौनियारका अनुसार सम्मेलनमा भारत, चीन, श्रीलंका, बंगलादेश, सिंगापुर, क्यानडा, टर्की र अमेरिकाका २० भन्दाबढी विदेशी विशेषज्ञ सहभागी हुनेछन् ।

सम्मेलनमा क्यान्सर रोगको उपचार पद्धतिको विषयमा अनुभव आदानप्रदान गरिने र विश्वमा पछिल्लो समयमा विकास भएको उपचार प्रविधिका बारेमा विज्ञहरुबाट कार्यपत्र प्रस्तुत गरिने सम्मेलन आयोजक समितिका सचिव डा उमेश नेपालले जानकारी दिनुभयो ।

चितवनको क्यान्सर अस्पतालमा हुन लागेको उक्त सम्मेलनमा क्यान्सर क्षेत्रमा कार्यरत विशेषज्ञ चिकित्सकले गरेको अध्ययन अनुसन्धान समेटिएको कार्यपत्रहरुसमेत प्रस्तुत हुनेछन् । सार्क फेडेरेशन अफ अंकोलोजिष्ट नेपालको यसअघिको तीन वटा सम्मेलन काठमाडाँैमा भएको थियो । यसपटक भने राजधानी बाहिर सम्मेलन गर्न लागिएको हो ।

सम्मेलनको यही कात्तिक १७ गते क्यान्सर रोग लागेर निको भएकी अभिनेत्री मनिषा कोइरालाले उद्घाटन गर्नुहुनेछ । पत्रकार सम्मेलनमा क्यान्सर अस्पताल चितवनका चिकित्सक डा विनय ठाकुरले सम्मेलनबाट क्यान्सर रोगको उपचारमा थप सहयोग पुग्ने आशा व्यक्त गर्नुभयो ।

तपाईको प्रतिक्रिया