लहान : त्रिशूली बस दुर्घटनामा परी मृत्यु भएका नेपाली काँग्रेसका महाधिवेशन प्रतिनिधि राजकपुर यादवको आज बिहान गृहनगर सिरहाको गोलबजार नगरपालिका– ८ स्थित चोहर्वामा अन्त्येष्टि गरिएको छ ।

छठ सकिएलगत्तै शुक्रबार साँझ आगामी मंसिर २१ गते हुने प्रदेशसभा निर्वाचनका लागि पार्टीका तर्फबाट टिकट पाउने आशामा रात्रि बस चढेर काठमाडाँै हिँड्नुभएका नेता यादव शनिबार ना ६ ख १४६७ नंको बस त्रिशूलीमा खस्दा उहाँसहित ३१ जनाको मृत्यु भएको हो ।

यादवको शव आफन्तले गए राति नै ल्याएको र आज बिहान हिन्दू परम्परानुसार अन्त्येष्टि गरिएको काँग्रेस सिरहाका जिल्ला सभापति रामचन्द्र यादवले जानकारी दिनुभयो । अन्त्येष्टिअघि सभापति यादवले मृतक यादवको पार्थिव शरीरमा पार्टीको झण्डा ओढाएर श्रद्धाञ्जलि दिनुभयो ।

प्रदेशसभा निर्वाचनका लागि सिरहा क्षेत्र नं ३ (ख) बाट यादवको नाम सिफारिस भएको र त्यही सिलसिलामा काठमाडाँै जाने क्रममा दुर्घटनामा परी उहाँको मृत्यु भएको थियो । स्व यादवका श्रीमती र दुई छोरा हुनुहुन्छ ।

यसैबीच यादवको दुर्घटनामा परी मृत्यु भएपछि सिरहाको गोलबजार नगरपालिका– ८ चोहर्वाका स्थानीयवासी स्तब्ध बनेका छन् । “यादव अलग धारको पार्टीका नेता भए पनि कसैको आँखामा नबिझाउने व्यक्ति थिए” वडाध्यक्ष राजदेव यादवले भन्नुभयो,“बस दुर्घटनामा मृत्यु भएको खबर पाए पनि तत्काल विश्वास गर्न सकिरहेका थिएनाँै, शव आएपछि मात्र विश्वास भयो ।”

यस्तै छठ मनाएर छोराछोरीलाई काठमाडौँमा पढ्नका लागि पु¥याउन सोही बसमा हिँडेकी सिरहाको लहान – १ सिङराहिकी प्रभा चौधरीको अवस्था पत्ता लाग्न सकेको छैन । आमासँगै दुर्घटनामा परेकी उहाँकी छोरी निविदिता र छोरा सुगमको भने उपचार भइरहेको प्रहरीले जनाएको छ ।

तपाईको प्रतिक्रिया