नेपालगन्ज २० भदौ । नेपालगन्जमा मिस कलेज बाँके–२०१७ प्रतियोगिता हुने भएको छ । नाईल ईभेन्ट एण्ड म्यानेजमेन्टले गरेको आयोजनामा नेपालगन्जमै पहिलो पटक मिस कलेज बाँके आयोजना हुन लागेको हो । भदौ ३१ गते हुने भनिएको मिस कलेजको पहिलो संस्करणमा १६ प्रतियोगीको सहभागिता रहेको मंगलबार आयोजित पत्रकार सम्मेलनमा जानकारी दिइएको छ । १६ बर्षदेखि २४ बर्ष उमेर समूहमा रहेका प्रतियोगिहरु विभिन्न जाती÷समुदायबाट प्रतिनिधित्व गरेका छन ।

मिस कलेज बाँकेको उपाधि बिजेताले करिब ३ लाख रुपैयाँको ईटालीजेट स्कुटी, फस्ट रनरअपले ल्यापटप र सेकेन्ड रनरअपले एलईडी टेलिभिजन प्राप्त गर्ने छन । अन्य आठ विधामा उत्कृष्ठ हुनेहरुले पनि आकर्षक गिफ्ट ह्याम्पर पाउने आयोजकले जनाएको छ । मिस ट्यालेन्ट, मिस फोटोजेनिक, बेस्ट पर्सनालिटी, मिस कन्फिडेन्स, बेस्ट ड्रेस, भ्यूअर्स च्वोईस र मिस मल्टिमिडिया विधामा पहिलो हुनेले आकर्षक क्वालिटी प्रोडक्ट प्राप्त गर्ने नाईल ईभेन्ट एण्ड म्यानेजमेन्टका प्रेसिडेन्ट प्रविण गिरीले जानकारी दिए । यस किसिमको प्रतियोगितामा पहिलो पल्ट मुस्लिम र शिख समुदायका युवतीहरुले पनि प्रतिनिधित्व जनाउँदैछन् । मिस कलेज नेपालगन्जको कोरियोग्राफी प्रज्ञा तिवारीले गर्दैछिन् ।

प्रमाणपत्र तह प्रथम बर्षदेखि स्नातक तह चौथो बर्षसम्मका युवतीहरु मिस कलेज नेपालगन्जका लागि ¥याम्पमा उत्रँदैछन् । प्रतियोगिहरुको आत्मविश्वास बढाउन र समाजका विविध पक्षबारे जानकारी गराउन उनीहरुलाई बन्द प्रशिक्षणमा राखिएको छ । विभिन्न विधाका विज्ञहरुले प्रतियोगिहरुलाई प्रशिक्षण दिईरहेका छन् ।

मिस कलेज नेपालगन्ज सम्पन्न गर्न करिब १५ लाख रुपैयाँ बजेट विनियोजन गरिएको आयोजकले जनाएको छ । मिस कलेजको मुख्य स्पोन्सर क्लासिक ह्विल रहेको छ भने स्पोन्सरहरुमा एस्पर्ट एजुकेशन, गोर्खा बु्रअरी, अम्बे फर्निसिङ, सुप्रिम ड्रिङ्किङ् वाटर लगायत रहेका छन् ।

तपाईको प्रतिक्रिया